من برة هالله هالله ومن جوه يعلم الله

هذا ما يتبعه الدكتور المحترم عصام شرف كمنهجاً لسياسته منذ تولى رئاسة الوزراء .. كل ما يهمه أن يعيد لمصر دورها العربى والافريقى والدولى
ماقلناش حاجة بس ننضف البيت الاول ونظبطه وبعدين نرش مية قدام الدار
ما ينفعش اسيب البلطجية سواء من البلطجية أومن أفراد الشرطة بيبرطعوا فى البلد ووزيرهم خيال مآته لا بيهش ولا بينش واجرى على برة اشوف الدولة دى والدولة دى يمكن نشحت منهم كام ميلون ولا كام مليار .. ما ينفعش أسيب أزمة السولار فى البلد وأروح أدور على إستثمارات خارجية اجيبها لجوه .. طب اظبط جوه الأول يا دكتور عصام .. ما ينفعش أسيب مشكلة الاجور فى مصر لواحد زى وزير المالية اللى مجنن الناس وكل يوم بكلمة وكل يوم برأى وكل يوم طالع علينا بطلته البهية كعب داير من قناة لقناة ومن برنامج لبرنامج عشان يقول اراءه المالية .. فين أفعاله ؟؟ فين مكتبه فى الوزارة ؟؟ ما بيعقدش فى مكتبه فى الوزارة يشوف دراسات الجدوى ويشوف حلول للأزمات ليه ؟؟ ووزير السياحة منير فخرى كرم الله وجهه فين شغله ؟؟ عمل ايه عشان يقنع السواح يرجعوا مصر تانى ؟؟ ما اجتمعش ليه مع وزير الداخلية وشافولهم حل للمصيبة اللى بلد فيها دى ؟؟ وزير التعليم فين ؟؟ فين سياسات التعليم الجديدة ؟؟ما سمعناش حسه من يوم ما مسك الوزارة .. دة انا حتى مش فاكرة اسمه
وزير القوى ما اعلنش ليه عن اى مشروع تتبناه الدولة ويشتغل فيه كام ألف عاطل من الشباب اللى قاعدين على القهاوى والفيس بوك؟؟
يا دكتور عصام .. المثل بيقول "رجل إن دارت عارت " كِن شوية فى البيت الله يخليك يا دكتور .. شوف جوه شوية قبل برة .. العناكب معششة فى اركان الدار وحضرتك عمال ترش مية برة .. ما ينفعش كدة خالص على فكرة
وبرضه ما ينفعش تبدى مشروع زويل للتكنولوجيا على موضوع الداخلية للأمن والاستقرار وعلى موضوع السولار لأكل العيش وعلى موضوع السياحة لتشغيل العاطلين .. ارجوك يا دكتور نظم أولويات البلد .. انت مش رئيس دولة ولا وزير خارجية .. هم دول اللى يلفوا ويبرموا برة .. انت رئيس وزراء يعنى المدير بتاع الوزرا .. لازم تسأل عن شغلهم يوميا ولازم كل وزير يقدم تقرير باللى اشتغله يوميا احنا فى فترة حرجة .. الخوف والرعب اللى هم فيه دة ما ينفعش لازم يشتغلوا بأقصى جهد ومش بس بأقصى جهد لازم كمان الناس تحس بشغلهم دة .. الحكاية مش بس تقارير وسياسات .. لازم ارض واقع
انا لو فتحت فى الكلام عن اوضاع البلد مش هانخلص .. بس لما حضرتك بتبرم برة البلد أمال فين وزير الخارجية بتاعك ؟؟؟