هو سافر وانا مشغووووووووووولة جدا جدا

تحديث:

بالنسبة لإياد سورة القرآن مسعرة بواحد جنيه لا غير ولما البيه أتم حفظ 18 سورة قبل ما باباه يسافر رفع المبلغ ل 20 جنيه ولما باباه سأله تحب تشترى ايه بالفلوس دى ؟؟

الباشمهندس الصغير رد عليه وقاله عايز اشترى Axe (طبعا دة من تأثير الاعلانات الى جانب انه بيقلد باباه)

بس باباه أقنعه انه ما يضيعش فلوسه فى الهوا ويشترى حاجة افضل

فقاله خلاص عايز تى شيرت

ولما كان اقل تى شيرت لاقيناه فى المحل كان ب 35 جنيه

إذن إياد مديون بحفظ 15 سورة

عشان تعرفوا ان احنا مش مقصرين مع الواد ومنغنغينه فى العز

=============

سافر زوجى لمهمة عمل تستلزم إبتعاده عننا فترة من الزمن قد تصل لبضعة أشهر

وترتب على سفره الآتى :

-

الساعة 8:00 صباحا : أصحى من النوم أتوضى وأصلى وأنضف الشقة بسرعة جدا وأنشر الغسيل أو ألمه وأطبقه وأشيله

-

الساعة 9:00 : أنزل أسخن العربية وأجرى أشترى اللى ناقص للفطار أو الغدا او العشا قبل العيال ما تصحى ولو فى اى اصلاحات فى العربية اصلحها عشان ما اتعطلش على المشوار اليومى

-

الساعة 10:00 : أرجع من برة أصحى العيال وبالعافية الباشا الكبير يغسل وشه ويتوضى ويصلى الصبح بالخناق

الساعة 10:30 : أحضر الفطار وأتحايل وأكل دة لقمة فى بقه ودى لقمة فى بقها وأشرب دة شفطة ودى شفطة لحد ما أحس إنهم خلاااااااص شبعوا

-

الساعة 11:30 : نبتدى حصة حفظ القرآن وبالمحايلة شوية والزعيق شوية والصريخ شويتين ... أخيرا نحفظ سورة من قصار السور على ألا تزيد السورة عن خمس أسطر وإلا الباشا إياد يصر إنه يكمل حفظ الباقى بكرة لأنه تعب خلاص

-

الساعة 1:00 : أتحايل على الباشمنهدس إياد عشان يقوم يصلى الضهر ويفاصل معايا انه يصلى الضهر ليه طالما هو لسه مصلى الصبح من شوية ؟؟؟؟؟؟

-

الساعة 1:30 : أدخل المطبخ جرى عشان أحضر الغدا

-

الساعة 3:00 : أبتدى أحضر هدومى وهدوم العيال وأكويهم إستعدادا للمشوار اليومى

-

الساعة 3:15 : أغدى العيال نص بطن على ما نرجع من بره عشان ماحدش يفضحنى فى الشارع ويقولى جعان يا مامى

-

الساعة 4:00 : آخد واحد واحد تحت الدوش أحمى وبعد كدة ألبس وأسرح

-

الساعة 4:30: أصلى العصر وما اجيبش سيرة الصلاة لإياد لانى ما عنديش وقت يعطلنى فى المحايلة والفصال واصلى ليه ما انا لسه مصلى الضهر والكلام الفارغ بتاعه دة باخدها من قصيرها واخرس خالص وانا بقول لنفسى مش مهم ما هو لسه ما كملش سبع سنين ... بعد الصلاه أخرج من باب الشقة جرى بعد غلق جميع الأجهزة والأنوار المفتوحة وأقفل الباب بالمفتاح قفلتين ... ودة ما يمنعش إنى أنسى المفاتيح فى الباب من شقاوة العيال واللهوجة والسرعة عشان نلحق ميعادنا ... بس الحمد لله لما برجع بعد تلات ساعات بلاقيه فى مكانه بستر ربنا !!!! دة غير السواقة بسرعة جدا عشان ألحق أوصل فى أقل من ربع ساعة ... والحمد لله بنوصل فى الميعاد مظبوط وبستر من ربنا برضه !!! اللهم لك الحمد

-

الساعة 5:00 : إياد عنده كورس إنجليزى أيام الاحد والثلاثاء والخميس من الساعة 5:00 لحد الساعة 7:00 وعنده تمرين سباحة أيام السبت والاثنين والاربعاء من الساعة 5:00 لحد الساعة 7:00

-

الساعة 7:30 : أدخل البيت جرى على الحمام أحمى العيال وألبس وأسرح

-

الساعة 8:00 : أجرى على المطبخ أسخن الغدا وأغدى العيال بذمة المرة دى وعلى راحتنا واكل واحد واحد فى بقه معلقة معلقة وبعد كدة نصلى المغرب انا والحاج إياد بعد مناهدة كبيرة لانه طول النهار تعبان ومش قادر يقف يصلى المغرب ولو انتى يا مامى مصرة انى اصليه مش لازم تلات ركعات كفاية اتنين .. وساعات كتيرة بوافق على الحل دة عشان اخلص لانى انا كمان تعبانة ومش قادرة أناهد

-

الساعة 9:00 : يا إما أذاكر لإياد الدرس اللى أخده فى الكورس وطبعا المذاكرة مش بالساهل كدة دى بتيجى بعد فصال ومناهدة معاه وإزاى يذاكر وهو خلص الامتحانات ونجح .. يا مامى هو فى حد بيذاكر فى الأجازة غير الولاد الوحشين اللى مش بينجحوا فى الامتحان؟؟ .. ولو ما فيش مذاكرة يبقى أغسل المايوهات وأنشرها وأغسل المواعين وأسيب العيال تتفرج شوية على توم وجيرى

-

الساعة 10:00 :أصلى العشا و أترمى على السرير أقلب قناة التليفزيون عشان أحاول أتابع العاشرة مساءا وأعرف الدنيا فيها إيه بعد ما العيال ناموا والبيت بقى هادى .. وطبعا لا يمكن أشوف أكتر من نص ساعة لأن النوم بيغلبى بسبب إرهاقى الشديد طول النهار

-

إوعوا تفتكروا إنى كدة خلاص خلصت مسئولياتى وإنى بنام من عشرة ونص بالليل لحد الساعة 8 صباحا ... انا مجبرة انى اصحى طول الليل كل ساعتين عشان ادخل إسراء الحمام وإلا هايحصل ما لا يحمد عقباه من فطير مشلتت على السرير لانى خلاص بطلت ألبسها الحفاضات وهى نايمة لانها كبرت والشهر الجاى ان شاء الله تكمل تلات سنين ...

تفتكروا بعد كل دة يبقى عندى وقت إنى ادخل على النت أو افتح الميل أو اتابع المدونات أو حتى أتابع مواقع الاخبار ؟؟؟

طبعا استحالة دة أنا لو روبوت كان زمانه هنج أو إنفجر

-

وقال إيه حماتى بتقولى على مثل شعبى بينطبق عليا

المثل بيقول : " اللى جوزها غايب تاكل الأكل نى وتقول عليه طايب"

انا شايفة ان المثل دة كان ممكن بنطبق عليا لو انا معنديش عيال

لكن فى المورستان اللى انا فيه دة .. لأ بقى دة وجود زوجى معايا كنا هايشيل عنى كتير اوى

-

خلاصة الرغى دة كله :

أحب اسمع أغنية

ما تحسبوش يا بنات ان الجواز راحة

ويا بيت ابويا معزتك فى عينيا